उपत्यकाकाे उत्तरी क्षेत्रबाट हुने सवारी आवागमनको लगत राख्न बालाजुमा सूचना केन्द्र निर्माण हुने

चैत १८, २०७७ बुधबार ,काठमाण्डाै – काठमाण्डाैको बालाजु बाइपासमा सूचना केन्द्र निर्माण हुने भएको छ । काठमाण्डाै महानगरपालिका र स्थानीय जनसहभागितामा करिब एक करोड ६ लाख रुपैयाँ लागतमा सुविधा सम्पन्न सूचना केन्द्र निर्माण गर्न लागिएको हो । बुधबार शहरी विकास राज्यमन्त्री रामवीर मानन्धर र काठमाण्डाै महानगरपालिकाका मेयर विद्यासुन्दर शाक्यले संयुक्त रुपमा सूचना केन्द्रको शिलान्यास गर्नुभयो । सूचना केन्द्रले उत्तरी क्षेत्रबाट हुने सवारी आवागमनको लगत राख्ने मन्त्री मानन्धरले बताउनुभयो । काठमाण्डाैबाट बालाजु नाका हुँदै बाहिरिने र भित्रिने सवारीको अभिलेख राख्ने, यातायातबारे सूचना राख्ने र सर्वसाधारणलाई काठमाण्डाैबारे जानकारी दिने उद्देश्यले सूचना केन्द्रको स्थापना गरिएको पनि राज्यमन्त्री मानन्धरले बताउनुभयो ।

‘समृद्ध नेपाल सुखी नेपाली’ को राष्ट्रिय आकांक्षा पूरा गर्न उपत्यकाका विभिन्न स्थानमा सरकारले अत्याधुनिक सुविधासहितको सूचना केन्द्रहरु स्थापना गर्ने लक्ष्य लिएको पनि बताउनुभयो । काठमाण्डाै महानगरपालिकाका प्रमुख विद्यासुन्दर शाक्यले सूचना केन्द्रको निर्माणले राजधानीबाट ल्याण्डफिल्ड साइट जाने फोहरका गाडीको लगत राख्न सहयोग पुग्ने अपेक्षा रहेको बताउनुभयो । यस्तै सूचना केन्द्रमा उपत्यका र काठमाण्डाै महानगरसम्बन्धी आवश्यक सबै सूचना उपलब्ध गराइने पनि बताउनुभयो ।

जसबाट महानगरबासी र पर्यटक समेतले फाइदा लिन सक्नेछन् । मेयर शाक्यले सार्वजनिक सूचना केन्द्रसँगै आधुनिक शौचालय, प्रहरी कार्यालय, ट्राफिक प्रहरी कार्यालय पनि त्यही भवनमा रहने बताउनुभयो । सूचना केन्द्रको निर्माण कार्य उपभोक्ता समितिमार्फत भइरहेको छ । महानगरपालिकाको ९५ लाख ६० हजार रुपैयाँ र उपभोक्ताले १० लाख ६० हजार रुपैयाँ व्यहोर्ने गरी कुल १ करोड ६ लाख २० हजार रुपैयाँमा सूचना केन्द्रको निर्माण हुनेछ ।

सम्बन्धित खवर

प्रतिकृया

Your email address will not be published.