गण्डकी प्रदेशका मन्त्रीहरुको सम्पत्ति : हिरा र सुनदेखि शेयर र सुन्तला बगैँचासम्म

भदौ १०, २०७८ बिहिबार ,काठमाण्डाै – गण्डकी प्रदेश सरकारका मुख्यमन्त्री र मन्त्रीहरुले सम्पत्ति विवरण बुझाएका छन् । ११ जना मन्त्रीमध्ये ९ जनाले सम्पत्ति विवरण बुझाएका हुन् । युवा तथा खेलकुद मन्त्री राजीव गुरुङ (दीपक मनाङे) र कृषिमन्त्री चन्द्र बुढाले भने सम्पत्ति विवरण पेस गरेका छैनन् ।

सम्पत्ति विवरण अनुसार कानुन, सञ्चार तथा प्रदेश सभा मामिलामन्त्री बिन्दुकुमार थापा सबैभन्दा बढी धनी देखिनुभएको छ । उहाँको पोखराका विभिन्न ठाउँमा ६ वटा घर तथा विभिन्न ठाउँमा होटलहरु छन् । यस्तै उहाँले आफूसँग १५ तोला हिरा, ९० तोला सुन, ५० तोला चाँदी, विभिन्न १० वटा बैंक तथा वित्तीय संस्थामा झण्डै १० करोड नगद मौज्दात, साढे सात लाख कित्ता शेयर रहेको उल्लेख गर्नुभएको छ । सबै सम्पत्ति सगोलमा र विभिन्न बैंकमा ३० करोड हाराहारी ऋण रहेको पनि उहाँले उल्लेख गर्नुभएको छ ।

मन्त्रीहरु कृषि व्यवसायमा पनि संलग्न छन् । वनमन्त्री दीपक थापासँग स्याङ्जाको ८ रोपनीमा उनले सुन्तला बगैँचा छ । २५ वटा बाख्रा, ७ सय ५० बोट सुन्तला, ६ रोपनी जग्गामा नर्सरी रहेको उहाँले सम्पत्ति विवरणमा उल्लेख गर्नुभएको छ । यस्तै स्याङ्जाको विरुवा गाउँपालिका वडा नम्बर २ मा पैतृक र खरिद गरेको जग्गा तथा पोखरा १४ मा ४० लाख रुपैयाँको जग्गा भएको उहाँले जानकारी दिनुभएको छ । विभिन्न बैंकमा १५ हजार नगद, ३० तोला सुन र २० तोला चाँदी रहेको उहाँले सम्पत्ति विवरणमा उल्लेख गर्नुभएको छ । विभिन्न बैंक तथा वित्तीय संस्थाबाट ६१ लाख ५० हजार ऋण लिएको उहाँको भनाइ छ ।

पर्यटन, उद्योग, वाणिज्य तथा आपूर्तिमन्त्री मणिभद्र शर्मासँग बाग्लुङ रुपन्देही र चितवनमा जग्गा छ । विभिन्न बैंक तथा वित्तीय संस्थामा सवा २ लाख नगद छ । विभिन्न कम्पनीको ८५ लाखको शेयर र २ करोड ४० लाख रुपैयाँ ऋण रहेको उहाँले सम्पत्ति विवरणमा उल्लेख गर्नुभएको छ ।

मुख्यमन्त्री कृष्णचन्द्र नेपाली पोखरेलसँग काठमाण्डौमा १५ आना जग्गा तथा तनहुँमा साढे ६ रोपनी जमिनसहित श्रीमती लता पोखरेलको नाममा ३ आना ४ पैसामा बनेको साढे २ तले पक्की घर छ । तलब बापत बैंकमा ५ लाख रुपैयाँ बचत रहेको तथा ५ तोला सुन रहेको उहाँले उल्लेख गर्नुभएको छ । यस्तै कृषि विकास बैंकबाट २५ लाख ऋण लिएको उहाँले देखाउनुभएको छ ।

अर्थमन्त्री रामजी बरालको पोखरामा २२ मा १ रोपनी ४ आना तथा थप ७ हजार २ सय ५ वर्गमिटर पैतृक जग्गा, ४७ लाखमा किनेको थप जग्गा छ । आफूसँग १० हजारको शेयर, नगद ३ लाख र सुन ४ तोला तथा छोरा र बुहारीको नाममा २ वटा मोटरसाइकल र एउटा स्कुटर रहेको उहाँले उल्लेख गर्नुभएको छ । यस्तै ६० हजार रुपैयाँमा किनेको एउटा गाई पनि उहाँसँग छ ।

भौतिक पूर्वाधार विकासमन्त्री कुमार खड्कासँग पोखरा १६ दीपमा ३८२ वर्गमिटर जग्गा र पक्की घर छ । श्रीमती कमला खड्काको नाममा पोखरा ३३ मा २२२ वर्गमिटर जग्गा छ । आफूसँग एक करोड ३२ हजार नगद र ५६ लाख ५० हजारको शेयर रहेको उहाँले सम्पत्ति विवरणमा उल्लेख गर्नुभएको छ । यस्तै ९५ तोला सुन र ४३ लाखको गाडी पनि छ ।

ऊर्जामन्त्री हरिशरण आचार्यले आफूसँग बुबाको नाममा गोरखा पालुङटारमा जग्गा, ८ तोला सुन र ५ तोला चाँदी रहेको उल्लेख गर्नुभएको छ । विभिन्न बैंकमा ५० हजार नगद छ भने कृषि विकास बैंक र प्रभु बैंकबाट ५० लाख ऋण लिनुभएको छ ।

स्वास्थ्यमन्त्री मधुमाया अधिकारीले आफूसँग लमजुङ, चितवन र मकवानपुरमा जग्गा रहेको उल्लेख गर्नुभएको छ । यस्तै ३ तोला सुन, विभिन्न बैंकमा ८ लाख ६० हजार नगद र एउटा स्कुटर रहेका सम्पत्ति विवरणमा देखाउनुभएको छ ।

शिक्षामन्त्री मेखलाल श्रेष्ठले आफूसँग १५ लाख नगद, १ किलो १९ तोला सुन, ७ किलो २ तोला चाँदी र एउटा हिराको औँठी रहेको उल्लेख गर्नुभएको छ । स्याङ्जा र काठमाण्डौमा दुईवटा घर तथा काठमाण्डौ, पोखरा र स्याङ्जाका विभिन्न ठाउँमा जग्गा रहेको जानकारी दिनुभएको छ । उहाँको ८ करोड रुपैयाँ ऋण पनि छ ।

सम्बन्धित खवर

प्रतिकृया

Your email address will not be published.